Hópbílar fá tvo nýja Irisbus

Hópbílar keyptu 12 nýjar rútur í fyrra og eru með 55 rútu flota.

Það er ekki á hverjum degi sem rútufyrirtækin íslensku kaupa nýjar rútur, en á dögunum fengu Hópbílar hf. afhentar tvær nýjar og glæsilegar 51 manna hópbifreiðar af gerðinni Irisbus Magelys PRO en þær rútur eru það nýjasta sem í boði er frá Irisbus og eru seldar hjá BL.

Bílarnir bætast í nýlegan bílaflota Hópbíla. Hópbílar hafa á undaförnum árum endurnýjað bílaflotann með markvissum hætti í takt við aukningu ferðamanna og tilkomu nýrra verkefna. Hópbíla keyptu t.a.m. 12 nýja hópferðabíla af BL ehf. á síðastliðnu ári og eru nú með 55 bíla flota. Nýju bílarnir eru að sjálfsögðu hannaðir í takt við nútíma kröfur með stærri rúður og meira útsýni en áður hefur boðist í bílum af þessari gerð.

Rúturnar eru búnar 450 hestafla 10 lítra dísilvél sem uppfyllir EURO-5 útblástursstaðal, ZF-Astronic rafskiptum gírkassa, skriðstillir og gírhemil. Öryggisbelti eru á öllum sætum, salerni og sjónvarp. Fullhlaðnar er hvor rúta um sig 19 tonn. Hópbílar hf. annast meðal annars akstur fyrir Strætó bs um Suðurland til Hornafjarðar, um Vesturland og Norðurland til Akureyrar ásamt því að sinna ferðaskrifstofum með erlenda ferðamenn, sem sífellt fjölgar á ferðum um landið.