Volkswagen Golf bíll ársins í heiminum

Porsche Boxter/Cayman valinn sportbíll ársins, Tesla Model S grænasti bíllinn og Jaguar F-Type sá best hannaði.

Margir hafa beðið eftir krýningu á bíl ársins í heiminum en á bílasýningunni í Genf fyrr í þessum mánuði hlotnaðis Volkswagen Golf titillinn bíll ársins í Evrópu. Því var sá bíll harla líklegur til að hljóta heimsnafnbótina bíll ársins og það varð raunin.

Voru verðlaunin afhent á bílasýningunni í New York sem er nýhafin. Er þetta annað árið í röð sem Volkswagen hlotnast þessi heiður en Volkswagen Up! vann í fyrra. Það voru 66 bílablaðamenn sem völdu bílinn nú og voru þessir 10 bílar um hituna; Audi A3, Range Rover, Mazda6, Mercedes Benz A-Class, Peugeot 208, Porsche Boxter/Cayman, Subaru BRZ/Toyota GT86, Volvo V40 og Volkswagen Golf.

Einnig var tilkynnt um titilinn "World Performance Car" og þar verð hlutskarpastur Porsche Boxter og Cayman. Þeir bræður höfðu betur gegn bílunum Aston Martin Vanquish, Audi RS5, BMW M6, BMW M135i, Ferrari F12 Berlinetta, Mercedes Benz SL63 AMG, Mercedes Benz SLS AMG Roadster, Renault Clio Sport og Subaru BRZ/Toyota GT86.

Titilinn "World Green Car" hlaut Tesla Model S og hafði sigur gegn bílunum Renault Zeo, Smart ForTwo Electric Drive, Volkswagen Jetta Hybrid og Volvo V60 Plug-In Hybrid Diesel. Verðlaunin "World Car Design" komu í skaut Jaguar F-Type og hafði hann betur gegn bílum eins og Aston Martin Vanquish, Renault Clio, Range Rover, Mazda6 og Volkswagen Golf.