Toyota greiðir 2.7 milljónir í bónus

Nær þó ekki 3,3 milljóna bónusnum sem greiddur var árið 2008.

Fyrir fáeinum vikum var greint hér frá því að Volkswagen hafi greitt starfsfólki sínu 1.200.000 krónur í bónus fyrir árið 2012. Það er þó ekki verra að vinna fyrir Toyota, því fyrir árið í fyrra greiddi það starfsfólki sínu 2.325.000 krónur á starfsmann og hefur samþykkt að greiða 2.693.000 krónur fyrir árið í ár.

Er þetta enn ein staðfestingin á því að fyrirtækið hefur að fullu jafnað sig eftir jarðskjálftann mikla árið 2011. Fyrir árið í ár ná bónusar starfsfólks þó ekki þeirri upphæð sem þeir fengu greitt árið 2008, eða 3,3 milljónir króna.

Japanska jenið hefur fallið um 17% frá lokum október á síðasta ári, sem hjálpað hefur japönskum bílaframleiðendum mjög við sölu til annarra landa og mikil bjartsýni ríkir í þeirra herbúðum. Ennfremur hefur verðhjöðnun verið snúið til hóflegrar 2% verðbólgu sem haft hefur jákvæð áhrif á efnahaginn.

Hlutabréf í Toyota hafa vaxið um 18% það sem af er þessu ári. Hagnaðarspá Toyota fyrir þetta ár var í síðasta mánuði hækkuð um 10%. Toyota seldi flesta bíla allra bílaframleiðenda á síðast ári og sló bæði við General Motors og Volkswagen samstæðunni.