Peugeot verði lúxusmerki PSA

Peugeot mun kynna 17 breytta eða nýja bíla á þessu ári.

PSA/Peugeot-Citroën ætlar að draga línurnar á milli bílamerkja sinna og gera Peugeot að meira lúxusmerki og Citroën að ódýrari bílum fyrirtækisins.

Peugeot mun kynna 17 breytta eða nýja bíla á þessu ári og þar á meðal GTI útfærslu af Peugoet 208 og 2008 jepplinginn. Peugeot mun á næstunni auka mjög á framleiðslu bíla sem talist gætu í lúxusflokki og meiningin er að verð á bílum Peugeot hækki nokkuð. Það er liður í að koma PSA úr tapi í hagnað á seinni helmingi áratugarins.

PSA tapaði 1,5 milljörðum Evra á síðasta ári af 58,4 milljarða veltu. Annað sem hjálpa á PSA að komast í plús er það markmið að 50% framleiðslu þess muni seljast utan Evrópu árið 2015. Hjá PSA vinna 209.000 manns, en 100.000 bara í Frakklandi en meiningin er að skera niður 11.200 störf í verksmiðju fyrirtækisins rétt fyrir utan París.Er það einn liðurinn í að koma fyrirtækinu aftur á réttan kjöl.