Finnur auð bílastæði

Búnaðurinn gæti minnkað umferðarþunga í borgum til muna.

Einn notadrýgsti búnaður sem hugsast getur í bíl er vafalaust upplýsingar um hvar má finna laus bílastæði í fjölmennum borgum.

Líklega er ekki langt að bíða slíks búnaðar í nýjum bílum því fyrirtækið Inrix hefur þegar þróað hann fyrir 18.000 bílastæði í Bandaríkjunum og 42.000 í 36 Evrópulöndum. Öll eru þessi stæði í bílastæðahúsum.

Ekki er nóg með að búnaðurinn láti vita af hvar auð bílastæði er að finna heldur fylgja með upplýsingar um hve mörg þau eru, hvað það kostar að leggja í þau og hver opnunartími húsanna eru. Lausnin byggir á WiFi tengingu bílsins við gagnabanka Inrix sem fær rauntímaupplýsingar frá bílastæðahúsunum.

Til mikils er að vinna með notkun þessa búnaðar því kannanir sýna að 30% af umferð þéttsetinna borga er falin í bílum þar sem ökumenn eru í leit af stæðum, 60% þeirra aka framhjá auðum bílastæðahúsum og það tekur meðalmanninn hátt í 20 mínútur að finna laust stæði.

Það fylgir ekki sögunni hvort einhver bílaframleiðandi hafi keypt þennan búnað frá Inrix nú þegar, en vonandi verður það sem fyrst.