Hollt og gott sætmeti - Hráfæðiskökur Siggu Eyrúnar

5. desember 2012 13:00

Sigga Eyrún býður upp á hollar og gómsætar hráfæðiskökur.

Söng- og leikkonan Sigríður Eyrún Friðriksdóttir býður uppskrift að hollum og gómsætum hráfæðiskökum, skreyttum með möndlum og hnetum. "Ég fékk innblástur af þessum kökum á hráfæðisnámskeiði sem ég var á með mömmu minni í Ljósinu fyrir tveimur árum," segir Sigríður.

Hráefni

1 dl döðlur

1/2 dl kókosflögur

1/2 dl hnetumix (valhnetur, möndlur, pecanhnetur, trönuber, pistasíur)

2 msk. kókosolía (brædd í stofuhita)

2 tsk. vanilluduft

Kókosrjómi (eftir þörfum, til að bleyta)

1-2 msk. (eftir því hvað þið viljið hafa þetta sætt) carob-duft (má líka nota kakóduft)

Aðferð

Látið döðlurnar liggja í bleyti í 1-2 klukkutíma, þá verða þær mýkri. Látið kókosmjólkina standa í ísskáp 2-3 tíma og takið svo rjómann sem flýtur ofan á.

Hakkið döðlurnar í matvinnsluvél og setjið í skál. Hakkið því næst hnetumixið og kókosflögurnar og blandið saman við döðlurnar og bætið carob- duftinu við.

Hellið kókosolíunni og kókosrjómanum út í þar til allt er orðið að klessudeigi sem auðvelt er að móta kúlur úr.

Setjið í frysti í smástund, deigið verður meðfærilegra þannig. Takið út og rúllið í litlar kúlur og setjið í lítil muffins-form, skreytið með því að setja hnetur og möndlur ofan á, eða eftir smekk.