Helgaruppskriftin - Kjúklingur með döðlum og kókos

Í nýju sælkerabókinni Orð, krydd og krásir sem nýlega kom í verslanir má finna þessa dásamlegu kjúklingauppskrift eftir þær Sigrúnu Óskarsdóttur og Kristínu Þóru Harðardóttur.

Kjúklingur með döðlum og kókos

½ dl ólífuolía

1 kg kjúklingabringur

2 laukar

1 græn paprika

1 kúrbítur

200 g steinlausar döðlur

1 hvítlaukur, smátt skorinn

2 tsk. kóríanderduft

1 tsk. chiliduft

2 tsk. engiferduft

2 tsk. broddkúmenduft

2 tsk. salt

1 dós kókosmjólk

3-4 msk. hunang

100 g kasjúhnetur

1 rauð paprika

Þessi réttur er bæði bragðsterkur og örlítið sætur. Fyrir þau sem eru fyrir sterkan mat má auka kryddið en gætið þess þó að sæta bragðið af döðlunum fái einnig að njóta sín.

Skerið kjúklingabringurnar í bita, saxið lauk og skerið papriku og kúrbít í bita.

Steikið kjúklinginn og laukinn upp úr olíunni á stórri pönnu. Bætið síðan 1-2 dl af vatni á pönnuna og setjið krydd og döðlur út í. Látið sjóða í nokkrar mínútur og bætið svo kókosmjólk og hunangi á pönnuna ásamt papriku og kúrbít.

Þetta er látið sjóða á vægum hita í 15–20 mínútur og undir lok suðutímans er kasjúhnetum bætt við og smátt skorinni rauðri papriku er stráð yfir um leið og rétturinn er borinn fram.