Sex rjúpur á hvern veiðimann

Nokkur þúsund veiðimenn héldu á rjúpnaslóðir í dag en veiðitímabilið hófst frá og með deginum í dag. Mælst er til þess að veiðimenn skjóti ekki meira en sex rjúpur hver.

Rjúpnaveiðitímabilið hófst í dag en líkt og í fyrra verður heimilt að veiða í níu daga. Tímabilið dreifist yfir fjórar helgar sem hér segir:

• Föstudagurinn 26. október til og með sunnudeginum 28. október.

• Laugardagurinn 3. nóvember og sunnudagurinn 4. nóvember.

• Laugardagurinn 17. nóvember og sunnudagurinn 18. nóvember.

• Laugardagurinn 24. nóvember og sunnudagurinn 25. nóvember.

Samkvæmt mati Náttúrufræðistofnunar er rjúpnastofninn í lægð og raunar enn á niðurleið um land allt.

„Stærð rjúpnastofnsins sveiflast reglubundið og hafa 10 til 12 ár verið á milli hámarksára, segir á vef Umhverfisstofnunar. „Miðað við fyrri sveiflur má búast við rjúpnaþurrð næstu ár; stofninn nær væntanlega lágmarki á árunum 2015-2018 og næsta hámark verður 2020-2022. Verði mikil afföll í rjúpnastofninum viðvarandi á næstu árum sé hins vegar ekki við því að búast að hin náttúrulega uppsveifla í lok þessa áratugar verði veruleg. Áætlaður veiðistofn nú er um 390.000 fuglar, en talið að veiðiþol sé 34.000 fuglar."

Miðað við ráðlagða veiði upp á 34 þúsund fugla mælist Umhverfisstofnun til þess að farið verði eftir ráðleggingum Náttúrufræðistofnunar um að hver veiðimaður skjóti ekki meira en sex rjúpur. Áfram er sölubann á rjúpu og ákveðið svæði á Suðvesturlandi er friðað fyrir veiði.

trausti@frettabladid.is