Risaurriðagangan frábæra á Þingvöllum á morgun

Jóhannes Sturlaugsson verður á morgun, laugardag, með árlega fræðslugöngu sína á slóðir ísaldarurriðans i Öxará á Þingvöllum.

Fræðslugangan sem gengur undir nafninu Urriðadans og er á vegum Þjóðgarðsins á Þingvöllum og Laxfiska hefst klukkan tvö eftir hádegi á bílastæðinu þar sem Valhöll stóð.

"Gangan spannar stutta og þægilega gönguleið upp með hrygningarsvæði urriðans. Fyrst er stoppað við brúna undan bílastæðinu til þess að fræða gesti um búnað sem er starfræktur þar undir brúnni sem gerir kleift að skrá ferðir urriða á leið til og frá hrygningarstöðvunum," segir á vef Stangaveiðifélags Reykjavíkur.

Gengið er með Öxará upp undir Almannagjá. Þar verða urriðar skoðaðir og fjallað um lífshætti þeirra. Að göngunni lokinn flytur Jóhannes erindi í Fræðslumiðstöðinni við Hakið.

"Rétt er að minna á það að fólki er ætlað að hafa sína hentisemi varðandi það hve lengi það tekur þátt í göngunni. Því sumum hentar að sjá framan í nokkra urriða og heyra það helsta um lífshætti þeirra á meðan aðrir stoppa lengur við og hlýða jafnvel á erindið sem er í lokin í Fræðslumiðstöðinni við Hakið," segir á svfr.is.

Fræðslugangan tekur nokkra stund og því rétt að minna fólk á að búa sig vel.