Gæsirnar falla á ökrunum í Gunnarsholti

Þótt gæsaveiðitímabilið hafi ekki náð hámarki hafa skotveiðimenn setið við akrana um nokkurt skeið með ágætum árangri. Til dæmis í Gunnarsholti eins og lesa má um á vef Lax-ár.

Fram kemur á lax-a.is að farið sé að taka á móti gæsaveiðimönnum í Gunnarsholti í Rangárvallasýslu og að veiðin hafi gengið vel það sem af er. Á sunnudagsmorgun hafi til dæmis einn veiðimaður náð kvótanum og tólf gæsum til viðbótar í gær.

"Oftast hefur mesta veiðin verið í október en seinnihluti septembermánaðar getur einnig verið drjúgur. Það stefnir allt í að svo verði líka í ár," segir á lax-a.is.

Veiðisvæði Lax-ár er sagt vera um 500 hektarar með mjög mörgum örkum. "Við höfum þó gætt þess að ofsetja svæðið ekki veiðmönnum til að skerða ekki gæðin fyrir hvern og einn. Leiðsögumaður er alltaf með í för með skyttum og velur hann akurinn hverju sinni, stillir upp gervigæsum og skipuleggur hvernig staðið er veiðum," segir á lax-a.is.

gar@frettabladid.is