Veiðivötn: 19. 647 silungar veiddust á stöng

Stangveiði í Veiðivötnum lauk 22. ágúst og netaveiði hófst 24. ágúst. Á stangveiðitímanum veiddust 19.647 fiskar sem er nokkru minni veiði en sumarið 2011, en þá fengust 21.240 fiskar.

Meðalþyngdin í sumar var aftur á móti betri en í fyrra eða 1,96 pund. Þetta er mesta meðalþyngd sem mælst hefur í Veiðivötnum frá árinu 2002. Mest var meðalþyngdin í Grænavatni 4.54 pund. Þar veiddist einnig stærsti fiskur sumarsins 16.4 pund.

Í heildina var þetta mjög gott veiðisumar í Veiðivötnum og veðurblíðan einstök, segir á Veidivotn.is en þar má einnig finna nákvæma sundurliðun veiðinnar eftir vötnum.

svavar@frettabladid.is