Eystri Rangá komin í 2.050 laxa

Eystri Rangá er komin yfir 2.000 laxa markið. Í gærmorgun voru 2.050 laxar komnir á land en aðstæður í ánni hafa ekki verið upp á það besta undanfarna daga.

Á vefnum lax-a.is segir að vegna leysinga hafi áin verið ansi lituð í þónokkurn tíma. Suma morgna hafi hún reyndar verið á mörkum þess að vera veiðanleg. Þrátt fyrir þetta hafi veiðimönnum tekist að kroppa upp nokkra laxa.

Á miðvikudaginn í síðustu viku, þegar veiðitölur Landssambands veiðifélaga voru síðast birtar, stóð veiðin í 1.885 löxum. Vikuna 8.-15. ágúst var veiðin í ánni aðeins 102 laxar sem þykir slakt fyrir Eystri Rangá á þessum tíma. Sem dæmi gaf vikan þar á undan tæplega 400 laxa.

Nú þegar er ljóst að vikan sem er að líða verður mun betri en sú síðasta enda voru í gærmorgun þegar komnir 2.050 laxar á land, eins og áður sagði.

"Okkar spá er að það verði veisla þegar liturinn lagast, það þarf ekki mikið að lagast til þess að veislan byrji. Samkvæmt veðurspá ætti það að gerast núna á næstu dögum, kólnandi og minna af rigningu á Suðurlandinu," segir á vef lax-a.is. Þar kemur ennfremur fram að einungis séu tveir daga lausir í ánni það sem eftir er þessa veiðitímabils.

trausti@frettabladid.is