Öllum boðið í Hlíðarvatn á morgun

Á morgun, sunnudaginn 26. ágúst, er öllum veiðimönnum boðið til veiða í Hlíðarvatn í Selvogi.

Á vef stangaveiðifélagsins Ármenn segir að öll veiðifélögin við vatnið standi að boðinu og sé þetta annað árið sem slíkur Hlíðarvatnsdagur sé haldinn.

"Í fyrra mætti mikil fjöldi manna og var gerður góður rómur af," segir á armenn.is þar sem félagsmenn eru hvattir til að mæta með fjölskyldur og vini.

Stangveiðifélag Hafnarfjarðar er einnig með aðstöðu við Hlíðarvatn. "Við hvetjum alla veiðimenn til að koma með sínar fjölskyldur, börn, barnabörn og veiða frítt í boði þeirra veiðifélaga sem selja veiðileyfi í Hlíðarvatni í Selvogi og fá kynningu frá kunnugum veiðifélögum um hvernig best er að bera sig að við veiðar í Hlíðarvatni í Selvogi. Veiðihúsin verða opin þennan tíma," segir á svh.is, vef Stangveiðifélags Hafnarfjarðar.

"Valinkunnir félagar verða á staðnum til leiðsagnar, skrafs og ráðagerða og er þetta spennandi tækifæri til að kynnast þessu fornfræga veiðivatni. Þessi árstími hefur oft verið gjöfull við Mölina og allt vestur að Kaldós og vert er að gefa Botnavíkinni gætur, þá sérstaklega "Botnlanganum" næst veiðihúsi Árbliks," segir ennfremur á armenn.is