"Birtir til" við Hrútafjarðará: Loksins vatn og veiði

Með hressilegum rigningum uppi á Holtavörðuheiði hefur vatnabúskapurinn í Hrútafjarðará tekið miklum og jákvæðum breytingum. Áin hefur verið bókstaflega niðri í harða grjóti í allt sumar sem hefur sett verulegt strik í reikning veiðimanna.

Í frétt á strengir.is segir að strax og rigndi breyttist allt í ánni og á laugardagsmorguninn komu þrír laxar á land úr Hólmahyl, sem er rétt fyrir ofan Dumbafljót neðst í ánni. Þá segir frá þeim gleðitíðindum að "eftir hádegi kom í ljós að mikið af laxi var komið upp í efstu staði bæði í Hrútu sjálfri og í Síká og settu menn í nokkra laxa þar, en náðu bara einum á land."

Ennþá eru lausar stangir í tveggja daga holli 19. - 21. ágúst segir á heimasíðu Strengja og því ennþá möguleiki að tryggja sér veiðileyfi í Hrútafjarðará í sumar.

svavar@frettabladid.is