Náði 101 sentímetra hæng á fimmuna

Glæsilegur 101 sentímetra hængur veiddist í Efri Gapastokk í Víðidalsá á fyrri vaktinni á laugardaginn. Það var Jóhann Hafnfjörð sem náði þessum fallega fiski á fluguna Green Braham nr. 14 og notaði hann léttan búnað eða stöng fyrir línu 5.

Þetta er annar laxinn úr Víðidalsá í sumar sem rífur 20 punda múrinn en það er óhætt að fullyrða að hængurinn hans Jóhanns vigtar ekki minna en 21 pund, samkvæmt töflu Veiðimálastofnunar um samband þyndar og lengdar á laxi.

Upplýsingar frá Lax-á greina frá því að það tók Jóhann um 15 mínútur að landa laxinum sem stökk ítrekað áður en honum var landað. Talsvert er af nýjum fiski að ganga í Víðidalsá og voru veiðimenn að setja í þónokkuð af fiski um helgina. Vatnsleysi setur þó mark sitt á veiði í Víðidalnum eins og annars staðar.

svavar@frettabladid.is