15 laxar á tvær stangir í Leirvogsá

Þrátt fyrir að aðeins sé veitt á tvær stangir í Leirvogsá komu 15 laxar á land þegar áin var opnuð í fyrradag. Á vef Stangaveiðifélags Reykjavíkur er fullyrt að þetta sé næst besta byrjun sem lestu menn muni eftir.

Stærsti fiskurinn vó 10 pund og veiddist hann í Helguhyl. Flestir laxanna veiddust þó í Brúarhyl en samkvæmt vef SVFR er fiskur víða í ánni.

Veiðin í Leirvogsá var dræm á síðasta ári en þá veiddust 383 laxar og 55 sjóbirtingar sem er langt undir meðaltali síðustu fjögurra ára sem er yfir 700 laxar. Metveiði var í Leirvogsá sumarið 2008 þegar 1.191 laxar veiddust.

Leirvogsá rennur úr Leirvogsvatni í Leiruvog í Faxaflóa. Áin er um það bil 12 kílómetra löng.

trausti@frettabladid.is