"Löndunarbið“ í Langá: Áfram mok í Elliðaánum

Langá á Mýrum var opnuð í dag. Eftir fyrstu vakt höfðu veiðst 22 laxar og voru þeir fengnir víða um ána. Mikill lax er genginn upp á miðsvæðin, að því segir í frétt á svfr.is.

Að sögn Jóhannesar Oddssonar veiðivarðar var lítið um að vera á neðri svæðunum en ofar í ánni var mikill hasar, t.d. á Stangarhylssvæðinu. Mikill lax er genginn í gegnum teljarann í Skuggafossi og það sem meira er, þá er Sveðjufossteljarinn farinn að tikka. Áin er því nánast öll virk upp á fjall, sem er með eindæmum. Vænir laxar eru í aflanum, og hafa glæsilegar tveggja ára hrygnur verið teknar í klakið.

Langáin opnar því á sömu nótum og nágrannaáin Hítará, eða með eindæmum vel.

Áfram ævintýri í Elliðaánum!

Allar stangirnar fengu kvótann í Elliðaánum í morgun auk þess sem að fjórum flugufiskum var sleppt. Á þremur vöktum hafa því veiðst 43 laxar!

"Morguninn í morgun sannar það að hin góða byrjun í gær var engin tilviljun" sagði Ólafur E. Jóhannsson í hádeginu í dag í viðtali við svfr.is. Segir hann flugulaxa vera að veiðast á undarlegustu stöðum, svo sem í Miðkvörn, Fossinum og Stórafossi. Ástæðan er að sjálfsögðu sú að að þegar að allir eru búnir með kvótann er flugan dregin fram og í ljós kemur að víða má fá lax á það agn, jafnvel í „ótrúlegustu pyttum."

Veislan heldur sem sé áfram í Elliðaánum.

svavar@frettabladid.is