Lax kominn á efra svæðið í Selá

Venjulega er efri hluti Selár í Vopnafirði ekki opinn laxveiðimönnum fyrr en eftir 10. júlí. Mjög gott vatn hefur verið í ánni og því var ákveðið að senda veiðimenn í smá könnunarleiðangur í fyrrakvöld að sögn Orra Vigfússonar, formanns Veiðiklúbbsins Strengs.

Laxastiginn í neðri fossi Selár var opnaður um síðustu helgi og renndu sér strax tugir laxa upp hann. Veiðimennirnir, sem sendir voru á efra svæðið, settu strax í nokkra og komu þrír á land úr Leifsstaðahyl og Réttarhyl.

„Áin hefur mikið hlýnað seinustu daga og þá á laxinn til að strika upp neðri fossinn og langt upp ána," segir Orri. „Við höfum verið að bíða með að velja góða veiðimenn á efra svæðið í Selá, en í svona árferði er yfirleitt mjög góð veiði í þeim hluta árinnar."

Nýr laxastigi var byggður enn ofar í ánni og eru miklar vonir bundnar við hann að sögn Orra.

„Nú getur laxinn farið á hrygningar- og uppeldissvæði eina 43 kílómetra, sem er langleiðina upp að Grímsstöðum á Fjöllum. Þetta er svipuð vegalengd og frá Reykjavík að Selfossi," segir Orri. "Auk þess er þarna mikil hliðará sem ber nafnið Selsá. Þar fóru laxar upp í fyrrahaust og þar eru áhugaverð hrygningarsvæði. Við félagarnir erum virkjunarsinnar, virkjum með náttúrunni, en látum hana að mestu ráða ferðinni. Vonandi tekst okkur að þrefalda veiðina á þessu merkilega vatnasvæði einu sinni enn."

trausti@frettabladid.is