Veiðistaðurinn – Kríueyja í Blöndu

Eyjan er góður veiðistaður sem er alltof sjaldan veiddur. þessi veiðistaður er fyrir neðan hinn fræga veiðistað Breiðuna sem hefur verið í fréttum eftir opnun Blöndu á dögunum.

Ef menn eru búnir að fullreyna Breiðuna sunnan megin þá er gott að fara niður að Eyju, segir í veiðistaðalýsingu á lax-a.is. Taka ætti örfá köst í átt að eyjunni út frá stóra steininum sem stendur upp úr ánni við eyjuna. Að því loknu þá veðurðu út í eyjuna og kastar svo á breiðuna neðan við Sandeyrina. Þarna liggja alltaf laxar frá opnun í júní og alveg fram á haust.

svavar@frettabladid.is