Tóti Tönn og félagar ekki í Blönduopnun

Þórarinn Sigþórsson tannlæknir og Páll Magnússon útvarpsstjóri verða í fyrsta sinn í mörg ár ekki í opnunarhollinu í Blöndu á þriðjudag. Laxinn er mættur í Blöndu.

Karl Lúðvíksson, forsprakki þáttanna Veitt með vinum með meiru, er meðal þeirra sem manna stangirnar fjórar í opnuninni.

"Þessi opnun verður annað hvort fjörtíu laxar eða tíu en miðað við árferðið og vatn lítur þetta vel út," segir Karl - Kalli Lú.

Þórarinn, eða Tóti tönn eins og hann er kallaður, hefur riðið á vaðið á svæði I í Blöndu í um áratug. Í opnunarhollinu hafa einnig verið Páll útvarpsstjóri sem fyrr segir, Egill Guðjohnsen tannlæknir og Stefán Sigurðsson sölustjóri hjá Lax-á. Þeir verða ekki með þegar fjörið hefst að þessu sinni.

Opnun Blöndu gefur iðulega afar væna stórlaxa sem þessa dagana eru að koma sér fyrir á Breiðunni og Damminum þar sem einmitt sást tólf til fjórtán punda lax í dag.

Blanda hefur verið nokkuð lituð að undanförnu en hefur verið að hreinsa sig og vatnsstaðan er góð svo vel lítur út með veiðarnar.