Veiði hefst í fjölda vatna í dag

Á meðal þeirra vatna sem opna í dag eru mörg af vinsælustu vötnunum í Veiðikortinu eins og Þingvallavatn og Úlfljótsvatn.

Í frétt á vef Veiðikortsins segir meðal annars:

„Meðal þeirra vatna sem opna eru mörg af vinsælustu vötnunum í Veiðikortinu og má þar nefna til dæmis Þingvallavatn og Úlfljótsvatn. Þess ber að geta að Ljósavatn fyrir norðan opnar ekki fyrr en 20. maí og Hítarvatn opnar ekki fyrr en síðustu helgina í maí. Langavatn á Mýrum opnar ekki fyrr en 15. júní þar sem vegurinn er yfirleitt ekki orðin almennilega fær fyrr en líða tekur á sumarið. Einnig er rétt að menn kynni sér ástand vega áður en haldið er í heiðarvötn eins og til dæmis í Hólmavatn, sem er nýtt vatn í Veiðikortinu 2012, og vötnin upp á Skagaheiði."

Forsvarsmenn Veiðikortsins minna veiðimenn á að fara vel yfir veiðireglur í bæklingi kortsins áður en haldið er af stað því í einhverjum tilfellum hafa orðið lítilsháttar breytingar sem vert er að kynna sér.

Á vef Veiðikortsins er ágætt yfirlit yfir opnun vatna sem Gunnar Ari Guðmundsson setti saman og er það birt með fyrirvara um villur. Yfirlitið er hér: https://www.veidikortid.is/lisalib/getfile.aspx?itemid=907