Arnar Jón kominn og líklega fleiri á leiðinni

Forráðamenn handknattleiksdeildar Stjörnunnar ætla sér stóra hluti næsta vetur og næstu ár. Stefnan er tekin beint upp í N1-deildina næsta vetur og þar ætlar Stjarnan síðan að festa sig í sessi á nýjan leik.

Skyttan örvhenta, Arnar Jón Agnarsson, hefur ákveðið að semja við sitt gamla félag en hann kemur til liðsins frá þýska B-deildarliðinu Aue þar sem hann stóð sig með miklum sóma síðustu tvö ár. Stjarnan er einnig í viðræðum við hornamanninn Gylfa Gylfason, sem hefur ákveðið að snúa heim frá Þýskalandi eftir langa dvöl þar í landi, sem og línumanninn Harald Þorvarðarson.

Þeir Gylfi og Haraldur eru æskufélagar og stefna á að spila saman á næstu leiktíð samkvæmt heimildum Fréttablaðsins. Fleiri félög hafa áhuga á þeim félögum.

Svo skilst Fréttablaðinu að Patrekur Jóhannesson hafi gefið vilyrði fyrir því að leika í vörninni með Stjörnunni á næstu leiktíð fari svo að liðið nái að styrkja sig almennilega og metnaður verði í starfinu.

„Konan hafði ekki lengur áhuga á að búa úti og barnið var ekki mikið hjá okkur. Það var því ekki hægt að halda þessu sjómannslífi áfram þó svo það hafi verið skemmtilegt. Það er líka gaman á Íslandi," sagði Arnar Jón um ástæður þess að hann ákvað að koma heim. Félag hans, Aue, náði ekki að tryggja sér sæti í nýju B-deildinni í Þýskalandi en Arnar efast ekki um að liðið komist upp í hana næsta vetur.

„Þetta var skemmtilegt og ég fékk mikið út úr því að vera hetja í litlum bæ í Austur-Þýskalandi. Mér gekk fáránlega vel bæði árin. Það var gaman að fara úr frystinum hjá Aroni Kristjáns yfir í að vera hetja í Þýskalandi. Ég get ekki neitað því," sagði Arnar sem er spenntur fyrir því að spila með Stjörnunni.

„Ég á ekki von á öðru en að ég fari í Stjörnuna og það koma vonandi fleiri til liðs við félagið á næstu dögum. Ég hef hafnað öðrum félögum og gert munnlegt samkomulag við Stjörnuna. Ég held að þetta verði spennandi vetur í Garðabænum," sagði Arnar Jón.