Sigurbergur: Nú getur ferillinn hafist af alvöru

Sigurbergur Sveinsson, stórskytta með meiru, skoraði sitt fyrsta mark á stórmóti í kvöld og var ekkert lítið sáttur þegar Vísir hitti á hann eftir leik.

"Mér fannst ekki leiðinlegt að skora get ég sagt þér. Nú get ég hafið ferilinn af alvöru. Ég er búinn að skora á stórmóti. Það var allt í lagi," sagði Sigurbergur afar glaður.

"Það má segja að við höfum pakkað þeim saman. Við mættum gríðarlega einbeittir til leiks eins og sást á byrjunni. 13-2 eftir 13 mínútur. Þetta var hrikalega öflugt," sagði Sigurbergur og staðfesti að það hefði verið mikill undirbúningur fyrir leikinn.

"Undirbúningurinn var rosalegur fyrir leikinn. Ég veit ekki hvað það voru margir videofundir fyrir leikinn en þeir voru ansi margir. Við uppskárum líka virkilega flottan sigur."