Ódýrar stangir í Ytri Rangá - ágóðinn til Fjölskylduhjálparinnar

Veiðifélagið Lax-á hefur ákveðið að bregðast við kalli Fjölskylduhjálpar Íslands og selur allar stangirnar 20 í Ytri-Rangá á morgun á sérstökum afslætti. Allar tekjur af sölu stanganna fyrir morgundaginn munu renna óskiptar til Fjölskylduhjálparinnar.

Þessi ákvörðun var tekin hjá Lax-á í dag þegar fréttir bárust af því að neyðarástand sé að skapast hjá Fjölskylduhjálpinni.

Stefán Sigurðsson sölustjóri hvetur veiðimenn til að bregðast við, hvort sem þeir komist í veiði í Ytri á morgun eða ekki. Margir eigi eflaust fullar kistur af fiski eftir sumarið og séu jafnvel tilbúnir að láta eitthvað af hendi rakna.

Á morgun kostar stöngin aðeins 7.500 krónur og vel reitist upp af fiski enn. Spáin er góð og vart þarf að minna á að Ytri-Rangá trónir á toppi listans yfir aflahæstu ár sumarsins. Allt bendir til að áin losi fimm þúsund veidda laxa.

Fyrir þá veiðimenn sem ekki komast í Ytri á morgun er reikningsnúmer Fjölskylduhjálparinnar:

101-26-66090, Kennitala: 660903-2590.