"Botnleðja mun snúa aftur!"

"Botnleðja mun spila saman aftur - og það eflaust á næsta ári," upplýsti Haraldur Freyr Gíslason, trommuleikari sveitarinnar, í útvarpsþættinum Vasadiskó á sunnudaginn. "Spurningin er bara hvernig það verður."

Haraldur uppljóstraði einnig að minnstu hefði munað að Botnleðja hefði komið fram á tónleikum í síðasta mánuði þegar blásið var í styrktartónleika fyrir sveitafélögin er átti að styðja undir bakið á þeim ef af verkfalli leikskólakennara yrði. Menn hefðu verið til í slaginn en svo hefði einfaldlega ekki gefist tími til þess að æfa.

"Ég krefst þess líka af hinum að við séum allir búnir að æfa vel - það er að segja í sitthvoru lagi - áður en við hittumst. Þannig að við séum ekki að eyða tímanum í að rifja upp lögin hver í sínu horni á æfingunum sjálfum," sagði Halli.

Halli sagðist lofa því að innan skamms yrðu haldnir Botnleðju tónleikar til þess að svala nostalgíuþörfum aðdáenda og vildi heldur ekki skjóta það af borðinu að sveitin myndi ef til vill vinna aðra plötu í framtíðinni.

Halli og Heiðar söngvari Botnleðju hafa unnið náið saman í Pollapönkinu síðastliðin ár en Ragnar bassaleikari hefur minna látið af sér kveða. Halli segist þó halda góðu sambandi við hann þó að þeir hittist ekki eins oft og hann og Heiðar.

Af Pollapönk er það að frétta að ný plata er að verða tilbúin auk þess sem búið sé að semja handrit fyrir leikrit þar sem söguþráðurinn var unninn upp frá textum laga sveitarinnar. Ekkert er þó niðurnelgt um hvenær sú sýning kemst á fjalirnar.

Fylgist með Vasadiskó á Facebook.