Hlynur: Mér fannst ég alltaf skulda liðinu

„Við vorum einum leik frá því að komast í úrslitakeppnina sem er alveg grátlegt en svona er þetta bara. Þetta hafðist ekki," sagði Hlynur Morthens, markvörður Vals og besti markvörðurinn í umferðum 15 til 21 í N1 deild karla.

„Það er hundfúlt og mjög undarlegt fyrir Valsmenn að vera ekki með í úrslitakeppninni. Ég tek undir með Óskari Bjarna að það sé bara fáránlegt að hafa ekki Val með í úrslitakeppninni," sagði Hlynur en Valsmenn áttu góðan endasprett eftir slaka byrjun á mótinu.

„Það er búið að ganga á ýmsu á þessu tímabili. Við erum búnir að lenda í þjálfaraskiptum og fórum í gegnum erfiða byrjun á mótinu. Við náum svo að vinna bikarinn sem var frábært og vorum svo komnir á mikið skrið eftir áramót. Það var komin góð mynd á liðið og við vorum síðan grátlega nálægt því að komast í úrslitakeppnina. Það hefði verið ótrúlegt ef að við hefðum komist þangað," sagði Hlynur.

„Það var hrikalegt að ná ekki byrjuninni á tímabilinu þannig að mér fannst ég alltaf skulda liðinu og geri enn. Mér fannst ég þurfa að leggja mig allan fram í leikjunum sem eftir voru og það gekk vel," sagði Hlynur.

„Þegar Óskar Bjarni kom inn í þetta þá kom hans handbragð á varnarleikinn. Hann matar mig líka af upplýsingum um andstæðinginn og ef maður er nógu vel undirbúinn þá nær maður að standa sig í þessum leikjum," sagði Hlynur sem var til í að spá í undanúrsliteinvígin í úrslitakeppninni.

„Ég held að ég verði að vera sammála flestum sem spá Akureyri og FH í úrslitin. Það eru klárlega tvö sterkustu liðin í dag. FH-ingar eru á miklu skriði núna og þetta eru þau tvö lið sem eru með langskemmtilegustu umgjörðina," segir Hlynur.

„Þetta verður frábær veisla fyrir handboltaunnendur ef þessi lið komast í úrslit. Maður veit samt aldrei hvar maður hefur HK eða Framarana. Það eru bæði óúteinkanleg lið sem gætu alveg stolið þessu," sagði Hlynur en það má sjá viðtalið með því að smella hér fyrir ofan.