Hátíðarborð Hönnu Margrétar

Hátíðarborð Hönnu Margrétar Einarsdóttur er sérstaklega hlýlegt þar sem jarðlitir í náttúrulegum og einföldum borðskreytingum úr kanilstöngum, lifandi jurtum og könglum spila aðalhlutverkið. Borðskreytingin er ekki síður barnvæn.

Hanna Margrét Einarsdóttir hefur meðal annars verið í hönnunarnáminu Mótun í Myndlistarskólanum í Reykjavík og segist heillast af náttúrulegum formum og jarð­litum. „Ég reyni oft að leggja eitthvað náttúru­legt í borðskreytingar. Ég átti kanilstangir sem mér finnst tilheyra jólunum, og notaði þær sem skreytingar á tauservíetturnar."

Hanna Margét á þrjú börn og segist oft verða vitni að því að börnum leiðist þófið við borðhaldið. Því hafi hún ákveðið að hafa borðhaldið barnvænt, með því að skreyta það með litlum fígúrum, hreindýrum, til að stytta börnunum stundir.

„Borðskreytingar þurfa ekki að vera flóknar eða þungar í vöfum og oftast finnst mér þessar einföldu langfallegastar. Þannig sleppti ég því að nota dúk því viðurinn nýtur sín vel við kertaljósin og skreytti meðal annars með hjartaarfa."- jma

Hanna Margrét Einarsdóttir með níu mánaða syni sínum. Loftljósið er úr Illum Bolighus og stólarnir smíði sjálfs Sveins Kjarvals.

Ofan á tauservéttu lagði Hanna Margrét kanilstöng og greinar af hjartaarfa. Snærisspotti er svo vafinn utan um.

Kertastjakinn er eins og lítið snjóhús en hann fékk Hanna Margrét í Kisunni. Hreindýrin eru barnaleikföng.

Formfögur glös frá Tsé Tsé.