Björgvin hetja Haukanna í Hafnarfjarðarslagnum

Björgvin Þór Hólmgeirsson tryggði Haukum 25-24 sigur á FH í æsispennandi Hafnarfjarðarslag í Kaplakrika í kvöld. Þetta er þriðji sigur Haukanna á FH í vetur þar af tveir þeir síðustu unnist með minnsta mun.

FH-ingar voru 13-12 yfir í hálfleik eftir að hafa byrjað leikinn vel og náð mest þriggja marka forskoti. Haukarnir tóku frumkvæðið í leiknum með því að breyta stöðunni úr 19-18 fyrir FH í 21-19 á fimm mínútna kafla um miðjan seinni hálfleik.

FH svaraði með þremur mörkum í röð og komust í 22-21 en Haukarnir létu það ekki á sig fá og Björgvin Þór Hólmgerisson tryggði liðinu síðan sigur 25-24 með lokaskoti leiksins.