Hanna: Förum alla leið

Hanna G. Stefánsdóttir, fyrirliði Hauka, var kampakát eftir sigur sinna manna á FH í dag en Haukar tryggðu sér deildarmeistaratitilinn með sigrinum.

„Þetta var snilldin ein, sér í lagi þar sem stefnan hjá okkur í vetur var að vera meðal fjögurra efstu í deildinni og komst í úrslitakeppninni. En þetta er búið að ganga ótrúlega vel og það var stór sigur fyrir okkur að verða deildarmeistarar.“

Hún sagði liðið þó ekki hafa spilað neitt sérstaklega vel í dag en segir að það verði lagað fyrir úrslitakeppnina. Þar mæta Haukar Fram í undanúrslitunum.

„Við höfum alltaf átt erfitt með Fram og ég býst því við hörkuleikjum. En það eina sem er í boði fyrir okkur er að fara alla leið.“