Ragnar Snær til Grikklands - HK búið að missa heilt byrjunarlið

HK heldur áfram að missa leikmenn úr handboltanum og nú síðast var það skyttan Ragnar Snær Njálsson sem ákvað að yfirgefa herbúðir félagsins. Hann hefur ákveðið að fara á vit ævintýranna til Grikklands.

Ragnar mun semja við gríska liðið Thermaikos til eins árs. Um er að ræða eitt af sterkari liðum Grikklands.

„Það hafa verið þreifingar hjá mér síðustu vikur með liðum í Noregi, Spáni og víðar. Ég ákvað svo á endanum að skella mér til Grikklands enda það dæmi afar spennandi," sagði Ragnar Snær sem hafnaði meðal annars norska liðinu Drammen.

„Ég fer þarna á fullan atvinnumannasamning og get lifað af handboltanum. Það skemmir ekki fyrir að þetta lið er í fallegum strandbæ þar sem veðrið er alltaf gott. Svo eru þessi bestu lið í Grikklandi víst sterk. Ég lít á þetta sem gott tækifæri og skemmtilegt ævintýri. Ég meina, hver er ekki kominn með nóg af Icesave og krepputali" sagði Ragnar kátur en hann fer utan í byrjun næsta mánaðar.

Það er ljóst að HK mætir mikið breytt til leiks á næstu leiktíð. Fyrir utan Ragnar þá hverfa einnig á braut þeir Sverre Jakobsson, Ólafur Bjarki Ragnarsson, Einar Ingi Hrafnsson, Björn Ingi Friðþjófsson, Sigurgeir Árni Ægisson og Gunnar Steinn Jónsson.

Ásbjörn Stefánsson, Már Þórarinsson, Hákon Bridde og Magnús Magnússon eru þess utan hættir.

HK hefur þó fengið liðsstyrk á móti og þar ber hæst að Ólafur Víðír Ólafsson snýr aftur í HK frá Stjörnunni. Sverrir Hermannsson kemur úr Víkingi.

Svo hefur Vilhelm Gauti Bergsveinsson rifið fram skóna að nýju en hann verður spilandi aðstoðarþjálfari. Lárus Helgi Ólafsson markvörður kemur frá ÍR og línumaðurinn Atli Ævar Ingólfsson kemur frá Akureyri.

Einnig koma tveir ungir leikmenn til liðsins frá Selfossi en þeir heita Halldór Stefán Haraldsson og Bjarki Már Elísson.