Umfjöllun: Jónatan og Hörður Flóki sáu um Fram

Akureyri vann í kvöld öruggan sigur á Fram í N1-deild karla, 27-18. Fram er því enn á botni deildarinnar með tvö stig en Akureyri er nú með sjö í þriðja sætinu.

Fram byrjaði betur í leiknum og komst í 9-5 forystu eftir rúmar fjórtán mínútur. Fram spilaði ágætlega þétta 6-0 vörn og gekk vel að leysa framliggjandi 3-2-1 vörn Akureyringa.

En Akureyringar voru fastir fyrir og náðu að snúa leiknum algerlega sér í hag. Á næstu 30 mínútum leiksins skoruðu gestirnir að norðan fjórtán mörk gegn aðeins tveimur frá Frömurum.

Sóknarleikur Fram var í algerum molum og það var aðeins hinn ungi Arnar Birkir Hálfdánarson sem lét af sér kveða í sókn Framara ef frá eru taldar nokkrar rispur hjá Magnúsi Stefánssyni. Meira var það ekki og virtist lánleysi Framara algert í leiknum.

Jónatan Þór Magnússon fór fyrir sínum mönnum og skoraði þrettán mörk í leiknum, þar af fjögur úr víti. Oddur Grétarsson var einnig öflugur en fyrst og fremst var það varnarleikur liðsins og markvarsla Harðar Flóka Ólafssonar sem gerði gæfumuninn í leiknum.

Framarar reyndu hvað þeir gátu til að koma sér aftur inn í leikinn en þeir Jónatan og Hörður Flóki sáu til þess að sigurinn væri aldrei í hættu.

Fram - Akureyri 18 - 27



Mörk Fram (skot): Arnar Birkir Hálfdánarson 8/4 (14/4), Magnús Stefánsson 4 (13), Halldór Jóhann Sigfússon 2 (3), Jóhann Karl Reynisson 2 (3), Stefán Baldvin Stefánsson 2 (6), Lárus Jónsson (1), Hákon Stefánsson (1), Andri Berg Haraldsson (6).

Varin skot: Magnús Erlendsson 12 (30/3, 40%), Sigurður Örn Arnarson 6 (15/1, 40%).

Hraðaupphlaup: 4 (Andri Magnús 1, Halldór Jóhann 1, Stefán Baldvin 1, Jóhann Karl 1).

Fiskuð víti: 4 (Halldór Jóhann 2, Stefán Baldvin 1, Arnar Birkir 1).

Utan vallar: 10 mínútur.

Mörk Akureyrar (skot): Jónatan Þór Magnússon 13/4 (17/5), Oddur Grétarsson 6 (9), Árni Þór Sigtryggsson 2 (8), Heimir Örn Árnason 2 (4), Hreinn Þór Hauksson 2 (2), Hörður Fannar Sigþórsson 1 (2), Guðlaugur Arnarsson 1 (1), Geir Guðmundsson (2), Guðmundur Helgason (2), Valdimar Þengilsson (1).

Varin skot: Hörður Flóki Ólafsson 22 (40/4, 55%).

Hraðaupphlaup: 8 (Oddur 5, Guðlaugur 1, Heimir Örn 1, Jónatan Þór 1).

Fiskuð víti: 5 (Árni Þór 2, Geir 1, Guðlaugur 1, Oddur 1).

Utan vallar: 14 mínútur.

Dómarar: Arnar Sigurjónsson og Svavar Pétursson, misstu aðeins tökin í seinni hálfleik.