Aron: Byggjum þetta skref fyrir skref

„Það er mikil vinna á bakvið þennan titil, menn hafa lagt mikið á sig í vetur og við erum bara að uppskera eftir því núna," sagði Aron Kristjánsson, þjálfari Hauka, eftir að hans lið innsiglaði Íslandsmeistaratitilinn í kvöld.

„Við stefnum á sigur í hverjum einasta leik og það kom ekkert annað til greina í kvöld en að tryggja titilinn. Það er góð stemning í hópnum og við náðum að byggja upp gott spennustig fyrir þennan leik. Menn voru alveg með á hreinu að sá stóri var á borðinu."

Haukar unnu alla leiki sína gegn Fram í deildinni í vetur. „Við höfum spilað fimm leiki við Fram í vetur, vinna fjóra og tapa einum. Við höfum verið rosalega grimmir í leikjunum á móti þeim. Þeir hafa gríðarlega sterkt lið. Við höfum haft betur innbyrðis gegn öllum efstu liðunum og það er frábært," sagði Aron.

En verður ekki erfitt að peppa mannskapinn upp í þeim leikjum sem eftir eru nú þegar titillinn er í höfn? „Það verður spennandi að sjá hvernig tekst að mótivera mannskapinn. Auðvitað reynum við að klára leikina með sæmd. En nú gefst tækifæri fyrir mig að gefa ungum leikmönnum leiki, við skulum bíða og sjá."

„Þetta er bara eitt skref. Við reynum að byggja þetta skref fyrir skref hjá okkur, bæði hvað varðar umgjörðina og svo liðið. Við erum þegar farnir að undirbúa næsta tímabil. Mikið af fólki hefur lagt á sig óeigingjarnt starf í vetur og það hefur haft mikið að segja."