HK og Valur skildu jöfn

Val mistókst að koma sér upp að hlið FH og Akureyrar á toppi N1-deildar karla eftir að liðið gerði jafntefli við HK á útivelli í dag, 22-22.

Valur hafði fimm marka forystu í hálfleik, 14-9, en það dugði ekki til sigurs. Valdimar Þórsson skoraði sjö mörk fyrir HK og Ragnar Hjaltested fjögur.

Hjá Val var Arnór Gunnarsson markahæstur með átta mörk en þeir Elvar Friðriksson og Baldvin Þorsteinsson skoruðu fjögur hvor.

Valur er í þriðja sæti deildarinnar með níu stig, einu á eftir FH og Akureyri. HK er í fimmta sætinu með sjö stig, rétt eins og Fram sem er með betra markahlutfall.