CCP margfaldar kúnnahóp sinn

Tölvuleikurinn EVE online verður í næsta mánuði settur í sölu á vefsíðunni steamgames.com en síðan er einn helsti dreifingaraðili á PC-leikjum í heiminum og er meðal annars framleiðandi Counter Strike, eins vinsælasta net-tölvuleikjar heims.

Að sögn Magnúsar Bergssonar, markaðsstjóra CCP, hafa samningaviðræður staðið yfir í níu mánuði. „Við vonum auðvitað að barnið dafni vel en þetta er í fyrsta skipti sem þessi síða tekur leik eins og EVE í sína notkun. Og auðvitað er alltaf gaman að ríða á vaðið,“ segir Magnús.

Notendur steamgames.com eru taldir vera tæplega þrettán milljónir en áskrifendur EVE eru í kringum þrjú hundruð þúsund. Magnús segir því ljóst að leikurinn sé að fikra sig inn á nýjan og enn stærri markað. Og það sé engin tilviljun að þeir hafi valið Steamgames. „Við gerðum á sínum tíma könnun hjá notendunum okkar og þar kom í ljós að fjörutíu prósent þeirra sem leika EVE höfðu spilað Counter Strike þannig að þetta er markaður sem við höfðum kynnt okkur vel,“ segir Magnús.

Athygli vakti eftir jól þegar greint var frá því að stjórnendur CCP gáfu starfsmönnum sínum Playstation 3 tölvu í jólagjöf. Samkvæmt heimildum Fréttablaðsins ætlar fyrirtækið að gera enn betur á árshátíðinni því fyrirtækið hyggst halda til Marakess í Marokkó. Magnús staðfesti þetta og segir að það sé nauðsynlegt fyrir fyrirtæki í svona miklum vexti að halda góðum starfsanda. „Þetta þjappar fólkinu saman,“ segir Magnús. - fgg