Tónamínútur fyrir flautu og píanó

Verk Atla Heimis Sveinssonar, Tóna­mínútur, verður flutt á tónleikum í Þjóðleikhúsinu á morgun í tilefni af Listahátíð í Reykjavík. Tónamínútur er verk fyrir einleiksflautu og flautu og píanó en flytjendur verða Áshildur Haraldsdóttir flautuleikari, Anna Guðný Guðmundsdóttir píanóleikari og tónskáldið sjálft.

Atli Heimir hefur verið leiðandi tónskáld í íslensku listalífi í áratugi og samið fjölda tónverka. Verk fyrir flautu eru áberandi á verkaskrá hans enda gjörþekkir hann hljóðfærið, möguleika þess og takmarkanir. Hann dregur fram eðli eða karakter flautunnar og skrifar tónlist þar sem syngjandi flaututónninn jafnt sem lipurð hljóðfærisins fær að njóta sín á tónsviðinu öllu. Í því samhengi má nefna að árið 1976 hlaut Atli tónskáldaverðlaun Norðurlandaráðs fyrir flautukonsert sinn.

Í fyrra kom út diskur sem inniheldur öll verk hans fyrir einleiksflautu og flautu og píanó í flutningi Áshildar Haraldsdóttur, tónskáldsins sjálfs og Önnu Guðnýjar Guðmundsdóttur og hlaut sá diskur tilnefningu til Íslensku tónlistarverðlaunanna sem besti diskur ársins 2006.

Á tónleikum Listahátíðar verða flutt nokkur þeirra verka sem sá diskur hefur að geyma: Xantis, fyrir flautu og píanó, frá árinu 1975, Lethe fyrir altflautu frá 1987, 21 tónamínúta fyrir einleiksflautu frá 1981 og Sónata fyrir flautu og píanó frá 2005.

Tónleikarnir hefjast kl. 15. á morgun.