Uppsagnir í vændum hjá Sony

Japanski hátækniframleiðandinn Sony hefur látið í veðri vaka að hann ætli að fækka í starfsliði sínu í Evrópu á næstunni. Svo getur farið að 160 manns verði sagt upp störfum.

Talsmaður Sony, segir helstu ástæðuna fyrir hagræðingu hjá starfsemi Sony í Evrópu vera breyttar markaðsaðstæður og í samræmi við nýtt skipulag sem auka eigi samkeppnishæfni fyrirtækisins.

Greinendur segja hagræðinguna fyrst og fremst komna til vegna dræmrar sölu á nýju leikjatölvunni frá Sony, PlayStation 3. Tölvan kom á markað um miðjan nóvember í Bandaríkjunum og Japan í fyrra en ekki undir lok nóvember í Evrópu, talsvert á eftir að hinir leikjatölvurisarnir, Nintendo g Microsoft, settu sínar nýjustu tölvur á markað.

Wii-tölvan frá Nintendo hefur víða selst afar vel og segir Sony, að áætlanir fyrirtækisins hafi ekki gengið sem skildi. Þegar fyrirtækið birti afkomuspá sína fyrir árið er gert ráð fyrir aukinni sölu.

Gangi spárnar eftir mun Sony skila 400 milljarða jena hagnaði á þessu ári. Þetta jafngildir ríflega 222 milljörðum íslenskra króna. Og það er ekki lítil breyting á milli ára því þetta er sexfalt meiri hagnaður en fyrirtækið skilaði í fyrra.