Spænsk lög sungin og leikin

Spænsk einsöngslög og dúettar frá ýmsum tímabilum hljóma á Háskólatónleikum í hádeginu á morgun, 14. mars. Valgerður Guðrún Guðnadóttir sópran, Hrólfur Sæmundsson baritón og Steinunn Birna Ragnarsdóttir píanóleikari flytja verk spænsku tónskáldanna Albeniz, De Falla og Granado og argentíska tónskáldsins Morillo.

Lögin eru allt frá barokktímanum fram á 20. öldina og heyra má bregða fyrir þjóðlögum, serenöðum og flamenco-tónlist með tilheyrandi látum.

Valgerður Guðrún Guðnadóttir lauk 8. stigi frá Söngskólanum í Reykjavík og útskrifaðist frá Guildhall School of Music árið 2000. Hún á að baki fjölda hlutverka í söngleikjum og óperum. Hrólfur Sæmundsson lauk meistaragráðu í einsöng við New England Conservatory of Music í Boston vorið 2001 en áður hafði hann lokið burtfararprófi frá Söngskólanum.

Hrólfur hefur komið fram á yfir 100 tónleikum hérlendis, austan hafs og vestan og á næsta ári á Norðurlöndunum, auk Englands og Serbíu. Á næstunni syngur hann m.a. hlutverk Polypheme í Acis og Galateu, og kemur fram á tónleikum í Frakklandi og Ítalíu.

Steinunn Birna Ragnarsdóttir píanóleikari stundaði nám við Tónlistarskólann í Reykjavík og lauk þaðan píanókennaraprófi árið 1979 og einleikaraprófi tveimur árum síðar. Hún lauk meistaragráðu frá New England Conservatory of Music í Boston árið 1987. Hún hefur víða komið fram og hlotið margvíslegar viðurkenningar.

Meðal þeirra einleiksverka sem hún hefur leikið með Sinfóníu­hljómsveit Íslands eru píanó­konsert Griegs og Slátta eftir Jórunni Viðar, en hvort tveggja hefur verið gefið út á geisladiski. Hún er stofnandi og stjórnandi Reykholtshátíðar sem haldin er árlega í júlílok. Næsta haust leikur hún einleik með hljómsveitinni Virtuosi di Praga í Rudolfini-salnum í Prag og með Hljómsveit Sankti Kristófers í Vilníus. -