Óska eftir tíu milljónum

Stjórn Tónlistarþróunarmiðstöðvarinnar, sem hefur hýst fjöldann allan af íslenskum hljómsveitum, hefur óskað eftir tíu milljónum frá Reykjavíkurborg til að halda rekstri stöðvarinnar áfram. Fái hún ekki stuðning verður starfseminni að Hólmaslóð 2 að öllum líkindum hætt í janúar.

„Við erum að vinna í því að fá ríki og borg til að koma að þessu og styðja þetta eins og þau gera varðandi aðrar tómstundir fyrir ungt fólk,“ segir stjórnarmaðurinn Guðmundur Ingi Þorvaldsson. „Við erum búin að vera að byggja þetta upp í fjögur ár og hvorki ríki né borg hafa veitt þessu stuðning að einhverju ráði.“

„Þetta var aldrei ætlunin að þetta yrði gróðastarfsemi eða að krakkarnir yrðu látnir standa straum að þessu. Það var alla tíð vonin að yfirvöld kæmu að rekstrinum. Hitt húsið var með svona aðstöðu til skamms tíma en hún var lögð niður,“ segir hann. „Það er gríðarleg þörf fyrir þetta,“ segir Guðmundur. „Ef starfsemin verður lögð niður verða 250 til 300 tónlistarmenn á götunni. Hlutir eins og Airwaves og fleiri ættu að sannfæra menn um að íslenskt tónlistarlíf á það skilið að verða tekið alvarlega.“

Vegna þrýstings frá stuðningsfólki Tónlistarþróunarmiðstöðvarinnar lagði Árni Þór Sigurðsson, borgarfulltrúi, í gær fram fyrirspurn á fundi í menningar- og ferðamálaráði Reykjavíkur þar sem hann óskaði eftir greinagerð um stöðu málefna miðstöðvarinnar. Þar kemur fram að leita skuli leiða til að tryggja áframhaldandi starfsemi miðstöðvarinnar.

Í Tónlistarþróunarmiðstövðinni eru fimmtán fullbúin æfingarými og salur til tónleikahalds. Yfirleitt deila þrjár hljómsveitir hverju rými og æfa nú í húsinu um fimmtíu hljómveitir, eða um 250 manns. Félagsmenn í félagi um Tónlistarþróunarmiðstöð eru um 750 talsins og fjölgar stöðugt. Hver hljómsveit borgar 25 þúsund krónur fyrir að fá að æfa í miðstöðinni. Staðan í dag er aftur á móti sú að afnotagjöldin og afnot af tónleikasalnum sem er í boði ná einungis yfir 50% af raunverulegum rekstrargjöldum.

Í húsnæði Tónlistarþróunarmiðstöðvarinnar er bannað að vera með áfengi. Þar er alltaf eftirlitsmaður, auk þess sem öryggiskerfi fylgist með því að allt gangi vel fyrir sig.