Ferskir frá Köben

Hiphop-sveitin Forgotten Lores spilar á Iceland Airwaves-hátíðinni á Nasa í kvöld. Tveir meðlimir sveitarinnar, Class B og Dj Intro, hafa verið búsettir í Kaupmannahöfn að undanförnu og því er ekki á hverjum degi sem hún spilar hér á landi.

Class B, eða Baddi, segist hafa flutt til Kaupmannahafnar til að breyta um umhverfi. Ég var kominn með leið á að búa í Reykjavík. Ég og Addi Intro höfum verið að dunda okkur saman þar, segir Baddi. Bætir hann því við að restin af Forgotten Lores hafi flogið til Danmerkur í sumar og saman hafi þeir tekið upp efni á aðra plötuna. Hefur hún fengið vinnuheitið Frá heimsenda og er væntanleg á næstu vikum. Fyrri plata sveitarinnar, Týndi hlekkurinn, kom út 2003.

Forgotten Lores er að spila á Airwaves í fimmta sinn í kvöld og hefjast tónleikarnir klukkan 00.15. Við erum ekki með live-bandinu í þetta sinn. Við erum þrír að rappa og tveir dj-ar. Við erum með taktana okkar og platan er þannig. Hún er aðeins léttari en sú síðasta, sem var svolítið þung á köflum, segir hann. Það hefur alltaf verið mjög gaman að spila á Airwaves. Það er svolítil vinna og stress sem því fylgir en þegar upp er staðið er það mjög skemmtilegt.

Eftir Airwaves-hátíðina fyrir tveimur árum fengu þeir félagar óvenjulegt boð um að spila í Washington. Lið sem sá okkur á Airwaves fannst við svo skemmtilegir að það bauð okkur að spila í jólasamkvæmi. Það var rosagaman.

Fleiri slík boð hefur ekki rekið á fjörur Forgotten Lores síðan þá en hver veit hvað hátíðin í ár ber í skauti sér?