Þjóðþekktir á tískupallinum

Það voru þjóðþekktir einstaklingar sem létu ljós sitt skína á tískupallinum í gærkvöldi á góðgerðakvöldi Debenhams. Ágóði kvöldsins rann til styrktar Krabbameinsfélags Íslands og söfnuðust 2,6 milljónir króna.

Stílisti sýningarinnar var fatahönnuðurinn Haffi Haff og sá hann um að klæða upp meðal annars Jóhannes í Bónus, Þorstein Pálsson, ritstjóra Fréttablaðsins, og Willum Þór Þórsson knattspyrnuþjálfara sem örugglega voru að stíga sín fyrstu skref í fyrirsætubransanum. Það voru hin ýmsu fyrirtæki sem lögðu málefninu lið og þurfti hvert fyrirtæki að borga 50.000 með hverjum einstaklingi sem fyrirtækið sendi á tískusýninguna. Málefnið var brjóstakrabbamein og bleikt þema var á kvöldinu sjálfu.

Ekki voru ofangreindir menn einu þekktu nöfnin á meðal sýnenda en Birgitta Haukdal söngkona, Eva María Jónsdóttir, fréttamaður í Kastljósi, Sigríður Klingenberg spámiðill og Guðrún Agnarsdóttir, formaður Krabbameinsfélagsins, tóku einnig þátt ásamt mörgum fleirum. Þeim til halds og traust sýndu sex módel frá EMM sem kenndu þeim sem ekki vissu hvernig best væri að nota tískupallinn og pósa framan í áhorfendur.