Marokkóskur lambaréttur

Hnífur og skeið

Guðrún Jóhannsdóttir eldar hægt.

Þótt frjósi í æðum blóð hér á Fróni getum við alltaf horfið á vit þúsundar og einnar nætur. Angan og bragð þessa marokkóska lambaréttar seiða fram hita í beinin og sólskin í sinnið. Saffron, kanill, hunang og pistasíuhnetur, keimur af roðagullinni sól sem sest í túrkisblátt haf. Lengi.

1,5 kg beinlaust lambakjöt (skorið í frekar litla bita)

Ólífuolía

1 laukur (smátt saxaður)

2 hvítlauksgeirar (marðir með hnífsblaði og saxaðir smátt)

25 g engiferrót (rifinn)

Klípa af saffrani (eða turmerik)

1 tsk kanill

2 msk tómatkraftur

650 ml lamba- eða grænmetissoð (af teningi)

350 gr þurrkaðar apríkósur (skornar í tvennt)

1 msk hunang (seigfljótandi)

50 g pistasíuhnetur

Setjið lambakjötið í pott eða pönnu með þykkum botni. Blandið saman við olíu, lauk, hvítlauk, engifer, saffroni, kanil, tómatkrafti og kryddið svo með salti og pipar. Steikið örlitla stund en hellið svo soðinu yfir. Látið suðuna koma upp og látið síðan kássuna malla á vægum hita í lokuðum potti í 1 og 1/2 tíma. Bætið þá apríkósunum út í ásamt hunanginu og látið malla áfram, nú loklaust, í 45 mínútur til viðbótar eða þar til sósan hefur þykknað hæfilega. Takið hneturnar úr skelinni og stráið þeim yfir réttinn og berið fram með kúskús og soðnum gulrótum. Gulræturnar eru steiktar örlitla stund ásamt cumin fræjum upp úr ólífuolíu og sítrónusafi kreistur yfir .