Glitrandi litadýrð

Indverskur fatnaður er nú til sölu á Íslandi, sem eykur talsvert á fjölbreytni í fataúrvali landans. Fatnaðurinn er mjög litríkur og fallega skreyttur og hægt að nota við ýmis tækifæri. Valgerður Shamsudin, sem sér um sölu og innflutning á fatnaðinum ásamt Salim eiginmanni sínum, segist sjálf hafa notað indverskan fatnað mikið og veki það athygli hvert sem hún komi. Það varð til þess að hún ákvað að selja hann hérlendis en hún telur að þetta sé fatnaður sem íslenskum konum ætti að líka vel. Fötin eru seld saman í setti sem er mussa, útvíðar buxur og sjal og er það selt á 6.500 kr.

Valgerður segir að hægt sé að nota settið saman en einnig sé hægt að blanda mussunni eða buxunum saman við aðrar flíkur. Hún segir þetta sérstaklega henta þeim konum sem vilja meiri liti í fatnaði og sé skemmtileg tilbreyting frá hinum hefðbundnu svörtu og hvítu flíkum. Fatnaðurinn er laus og þrengir ekki að þannig að manni líður vel í honum og getur hann hentað óléttum konum vel. Fatnaðurinn er til sölu í gegnum heimasíðuna www.simnet.is/salim en fólki býðst einnig að koma til Valgerðar og Salim til að máta fötin.