Bann Mane stendur, áfrýjun Liverpool hafnað

Enska knattspyrnusambandið hefur staðfest þriggja leikja bann Sadio Mane, en Liverpool áfrýjaði lengd bannsins.

Forráðamönnum Liverpool fannst bannið of langt, en Mane fékk að líta beint rautt spjald í 5-0 tapi gegn Manchester City á laugardaginn.

Í yfirlýsingu frá enska knattspyrnusambandinu segir: „Þriggja leikja bann Sadio Mane stendur eftir að áfýjun vegna harðrar refsingar var hafnað.“

Senegalinn Mane mun því missa af leikjum Liverpool gegn Burnley og Leicester í úrvalsdeildinni og gegn Leicester í deildarbikarnum.