Griezmann ekki lengur í forgangi hjá Man Utd

Kaup á Antoine Griezmann eru ekki lengur í forgangi hjá Manchester United. Breskir fjölmiðlar greina frá þessu í dag.

Griezmann, sem leikur með Atlético Madrid, hefur verið þrálátlega orðaður við United undanfarna mánuði.

Meiðsli Zlatans Ibrahimovic breyttu hins vegar forgangsröðun United á félagaskiptamarkaðinum.

Nú er forgangsatriði að kaupa framherja sem getur fyllt skarð Zlatans en ekki sóknarsinnaðan miðjumann.

Atlético hefur væntanlega lítinn áhuga á að selja Griezmann þar sem liðið er í félagaskiptabanni og má ekki kaupa leikmenn fyrr en í janúar á næsta ári.

Griezmann hefur skorað 83 mörk í 160 leikjum með Atlético undanfarin þrjú ár. Hann kom til Madrídarliðsins frá Real Sociedad sumarið 2014.