Jimmy Swaggart allur

Swaggart var frá Louisiana-ríki Bandaríkjanna. Hann fæddist í fátækt í mikla tónlistarfjölskyldu. Jerry Lee Lewis, rokkfrumkvöðull, var til að mynda frændi hans. Swaggart segist hafa verið átta ára gamall þegar hann heyrði rödd Guðs í fyrsta sinn, og frá þeim degi hafi líf hans breyst. Þegar Swaggart var 23 ára gamall gerðist hann prédikari, sem einkenndist meðal annars af því að hann söng og spilaði gospel-tónlist á píanó.

Vinsældirnar jukust smátt og smátt. Hann byrjaði með útvarpsstöð, kom tímariti á fót, og færði sig svo í sjónvarpið.

Viðhorf Swaggart voru umdeild. Hann sagði kaþólska trú vera „falskt trúarbragð“ og sagði þúsund ára þjáningu gyðinga vera vegna þess að þeir höfnuðu Kristi.

Sjónvarpsprédikunin gekk gríðarlega vel. Árið 1986 var viðskiptaveldi hans metið á 142 milljónir Bandaríkjadala.

Gómaður með vændiskonu

Árið 1988 var Swaggart ljósmyndaður ásamt vændiskonu sem sagði fjölmiðlum í kjölfarið að þau tvö hafi ekki stundað kynlíf, en að hann hafi borgað henni fyrir að sitja fyrir nakin.

Í aðdraganda þessa hneykslismáls hafði Swaggart sakað annan prédikara, Marvin Gorman, um kynferðislegan ólifnað. Það var Gorman sem réði ljósmyndarann sem gómaði Swaggart með vændiskonunni. Síðar borgaði Swaggart 1,8 milljónir Bandaríkjadala til Gorman vegna ásakananna.

Eftir að hneykslismálið með vændiskonuna kom á yfirborðið. Hélt Swaggart líklega sína frægustu sjónvarpsmessu. 

„Ég hef syndgað gagnvart þér, drottinn minn,“ sagði Swaggart meðan tár runnu niður kynnar hans.

Fleiri hneyksli fylgdu. Árið 1991 var Swaggart handtekinn ásamt annarri vændiskonu. Hann var ákærður fyrir að keyra á óskráðum Jagúar á röngum vegahelmingi. Sú vændiskona vildi meina að Swaggart hefði orðið stressaður þegar hann sá lögreglubíl, og skipt um vegahelming meðan hann reyndi að fela klámblöð undir sæti sínu.

Í kjölfarið hvarf Swaggart að miklu leyti úr sviðsljósinu. Hann hélt þó ótrauður áfram að predika og vakti athygli af og til.

„Faðir minn var baráttumaður. Faðir minn var prédikari. Hann vildi ekki vera neitt en boðberi Guðspjallsins,“ sagði sonur hans, Donnie Swaggart, sem er einnig predikari um föður sinn þegar hann tjáði sig um andlátið.

Swaggart skilur eftir sig eiginkonu, þrjú born, tvö barnabörn og níu barnabarnabörn.