Körfubolti

Kraftaverkamaðurinn Gunnar Már sem þjálfarinn kallar Jesús

Stefán Árni Pálsson skrifar
Baldur og Ingi Þór vinna mjög náið saman. Gunnar Már kom inn seint í úrslitakeppninni og skipti sannarlega sköpum.
Baldur og Ingi Þór vinna mjög náið saman. Gunnar Már kom inn seint í úrslitakeppninni og skipti sannarlega sköpum. vísir/hulda margrét

Baldur Þór Ragnarsson segir að menn innan teymisins hafi farið nýstárlegar leiðir í úrslitakeppninni til að halda mönnum heilum í gegnum þessar álagsmiklu vikur. Þar kom við sögu hreyfifræðingurinn Gunnar Már Másson maður sem hann kallar einfaldlega Jesú.

Stjarnan vann Tindastól í oddaleik um Íslandsmeistaratitilinn í Síkinu fyrir norðan í maí. Þar á undan fór liðið í gegnum Grindavík einnig í fimm leikja seríu. Fjóra leiki þurfti síðan til að slá út ÍR í 8-liða úrslitunum. 14 leikir á rúmlega sex vikum. Álagið mikið. Svona fór þjálfarateymið að því að halda mönnum í standa. Baldur talaði um Gunnar Má strax eftir oddaleikinn 21. maí í Körfuboltakvöldi.

„Það sem gleður mig að sjá þarna er Gunnar Már Jesús sjálfur með kampavínið. Ég hef aldrei einn mann hafa eins mikil áhrif á íþróttalið ever. Þetta er kjarkurinn þessi maður. Það er andleg orka frá honum og hann bara lagar menn. Ef þér er illt þá lagar hann þig, ég hef aldrei séð svona apparat. Ingi Þór [Steinþórsson, aðstoðarþjálfari] finnur bara svona menn,“ sagði Baldur eftir leikinn í maí.

Og Baldur hélt síðan áfram að ræða manninn í Sportpakkanum á Stöð 2 í gærkvöldi sem og aðstoðarþjálfarann sinn.

„Ingi Þór á þetta bara. Hann er bara kominn í samband við einhverja sjúkraþjálfara sem tala um Greenfit og einhverjar öndunarklefa og hann er bara búinn að panta einkatíma fyrir alla og segir þeim hvenær þeir eiga mæta. Hann er bara með þetta frá a-ö,“ segir Baldur og heldur áfram.

„Svo finnur hann Gunnar Már sem er bara ótrúlegur fixer. Ef þér er illt einhvers staðar þá bara lagar hann það. Ég hef aldrei séð annað eins. Hann bara græjar menn. Ég get þá bara þjálfað liðið og einbeitt mér að því. Þetta er oft á Íslandi að þú ræður þjálfara og hann á að þjálfa þrjá yngri flokka með og vera yfir þessu og svara tölvupóstum hérna. Þú ert að ráða þjálfara og hann er bara orðinn framkvæmdastjóri félagsins og getur ekkert þjálfað því hann er í samskiptum við foreldra allan daginn.“




Fleiri fréttir

Sjá meira


×