Þeir bestu: Fylgt úr hlaði

Fyrir tveimur árum stóð Vísir fyrir valinu á fimmtíu bestu leikmönnum í efstu deild karla í handbolta á þessari öld. Og nú er komið að fótboltanum.

Fyrst af öllu, af hverju að byrja 1992? Fótboltinn var nú ekki fundinn upp fyrir 33 árum. Vissulega ekki en einhvers staðar varð að byrja. Kannski væri takmarkað mark takandi á lista yfir bestu leikmanna allra tíma í efstu deild á Íslandi, frá 1912 þegar fyrsta Íslandsmótið fór fram. Rúm þrjátíu ár er líka dágóður tími.

Svo markar 1992 líka þáttaskil í fótboltasögunni. Jújú, enska úrvalsdeildin og Meistaradeild Evrópu voru settar á laggirnar þá máttu markverðir heldur ekki lengur taka boltann upp með höndum eftir sendingu frá samherja. Það er ef til vill besta breyting sem hefur verið gerð á fótboltanum. Horfiði á úrslitaleik EM 1992 milli Danmerkur og Þýskalands og reynið að vera ósammála.

Reglan um sendingar til baka var vissulega bara tekin upp í síðustu umferðunum á Íslandi sumarið 1992 en það er ágætt að miða við það. Það sumar var líka byrjað að taka saman tölfræði yfir stoðsendingar í efstu deild á Íslandi.

Svo það sé sagt er þetta ekki listi yfir bestu leikmenn Íslands á umræddu tímabili heldur frekar þá sem hafa sett mestan svip á fótboltann hér heima, gerðu mest í deildinni okkar og höfðu úrslitaáhrif á það hvert stóru titlarnir fóru. Goðsagnir efstu deildar með öðrum orðum.

Líkt og við valið á fimmtíu bestu handboltamönnunum var notast við heimatilbúið og heldur nördalegt stigakerfi. Rúmlega tvö hundruð leikmenn voru vegnir og metnir samkvæmt því. Þar var horft til titla, einstaklingsverðlauna, marka, stoðsendinga og sérstakra bónus stiga fyrir varnarmenn og markverði. Hægt hefði verið að hafa fleiri leikmenn undir en einhvers staðar varð að segja stopp.

En svo listinn yrði nú marktækur var einnig leitað til 25 álitsgjafa sem voru beðnir um að velja sína tíu bestu leikmenn í efstu deild frá 1992. Reynt var að hafa álitsgjafana á nokkuð breiðu aldursbili en þeir hafa allir fjallað um íslensku deildina með einum eða öðrum hætti síðustu ár. Og þeir deila ástríðu og áhuga á deildinni okkar.

Sérfræðingarnir

Stigagjöfin og álit sérfræðinga rímaði ágætlega saman og ætti að gefa ágætis mynd af því hverjir bestu leikmenn efstu deildar frá 1992 eru. Eða allavega eitthvað nálægt því. 

Svona lagað er auðvitað aldrei meitlað í stein eða einhvers konar ríkisskoðun. Hverjum finnst sinn fugl fagur og allt það. Fólk lítur líka eflaust til mismunandi þátta þegar það vegur og metur hverja það telur besta í einhverju. Og hvað er að vera bestur? Það er líka afstætt.

En þetta er allavega tilraun til að greina sögu efstu deildar síðustu rúmu þrjátíu árin og hampa þeim leikmönnum sem gerðu sig öðrum fremur gildandi á því tímabili. Athugið að öll tölfræði og afrekaskrá miðast við tímabilin 1992-2024.

Fyrsti hluti niðurtalningarinnar birtist í dag. Fyrst munu birtast tíu leikmenn í einu, síðan fimm, svo tveir og loks einn.

Njótið!