Erfingi milljarða og tugir milljóna í stórútgerðinni: „Lífið er miklu meira en peningar“

Það var DV sem fjallaði fyrst um umsvif Jóns Péturs Zimsens á hlutabréfamarkaði í dag. Þar segir, sem rétt er, að umsvif hans á samfélagsmiðlum hefur ekki vakið minni athygli. Færslur hans um biturð og ráðríki hinna fátæku í garð þeirra „sem eru vel stæðir“ hafa vakið gagnrýni enda er hann erfingi umtalsverðra fjármuna.

Af gríðarlega auðugum ættum

Eins og nafnið gefur til kynna er Jón Pétur af Zimsenættinni sem eru afkomendur Christians Zimsen sem stofnaði Laugarnesapótek og sat í stjórn lyfjafyrirtækisins Pharmaco hf. sem síðar varð Actavis. Zimsensystkynin, Kristinn, Nils, Else og Jón, eiga áttu samanlagða rúma sjö milljarða króna samkvæmt umfjöllun Viðskiptablaðsins frá árinu 2013.

Hann lítur þó sjálfur á það sem svo að þeir sem minna eiga á milli handanna séu líklega bitrir.

„Einhver hefur komið illa fram við þà og þeir eru í vandræðum með sjálfsmynd sína. Þeim finnst þeir ekki metnir að verðleikum og að heimurinn sé ÓSANNGJARN. Að allt sé einhverjum ÖÐRUM að kenna og því nærtækt að kenna þeim um sem hafa það betur,“ skrifaði hann í færslu sem hann birti á samfélagsmiðlum á fimmtudaginn síðasta.

Hátt í hundrað milljónir í stórútgerð

Þegar Jón Pétur sór drengskaparheitin þurfti hann sem aðrir að skrá umsvif sín í viðskiptalífinu í hagsmunaskrá. Samkvæmt því er þar kemur fram á hann 41,1 prósent hlut í Jöká ehf., 55 prósent hlut í Alnitak ehf. og 15 prósent hlut í RZ ehf. Af opinberlega aðgengilegum ársreikningum er Jöká það umsvifamesta en þar er Jón Pétur stærsti eigandi. Meðeigendur hans eru Nils, Óli Björn og Jóhann Tómas Zimsen og er félagið skráð með heimilisfesti heima hjá Jóni Pétri.

Sjá einnig: Kennarar ættu að koma sér úr hlutverki fórnarlamba

Eigið fé Jöká ehf. var samkvæmt síðasta ársreikningi, frá rekstarárinu 2023, samtals 830.448.441 krónur. Hagnaður nam rúmum 217 milljónum króna. Hlutabréf í eigu félagsins nema rúmum hálfum milljarði króna og þar á meðal eru hlutir í Brim, Marel, Hampiðjunni og Iceland Seafood International sem voru árið 2023 virði tæplega 90 milljóna króna. Miðað við hlut félagsins í Kerecis sem hefur síðan verið selt fyrir á annað hundrað milljarða má gera ráð fyrir því að eignasafn Zimsenanna sé talsverðs meira virði í dag.

Auk eignarhluts félagsins í fyrirtækjum í sjávarútvegi fjárfesti Jöká einnig í skuldabréfum árið 2023. Þeirra á meðal voru skuldabréf útgefin af Útgerðarfélagi Reykjavíkur, stærsta eiganda Brims upp á 20 milljónir og 80 milljón króna víxil frá Iceland Seafood.

Ástríða fyrir árangri unglinga - ekki peningum

Þegar fréttastofa bar ofangreint undir Jón Pétur sagði fréttaflutning um umfangsmikil umsvif sín í sjávarútvegi ekki til þess fallinn að draga úr trúverðugleika sínum, eða hitt þó heldur.

„Því betur sem íslenskum fyrirtækjum gengur því betra fyrir alla sem eiga í þeim og allt samfélagið þar sem skattspor eykst við góðan árangur. Bæði hefur fólk fjárfest beint í þeim og svo eiga lífeyrissjóðir töluvert í þeim eins og öllum fyrirtækjum á markaði,“ segir hann í samtali við fréttastofu.

Hann segist hafa tekið þátt í atvinnulífinu í langan tíma og segir flesta eiga að gera það sem hafa til þess fjárráð og þola áhættuna. Jón Pétur segir það raunar koma sér vel að stjórnmálamenn eigi eignarhluta í ofangreindum félögum „þegar stjórnmálamenn reyna að skaða fyrirtæki í almannaeigu.“ Þar á hann væntanlega við veiðigjaldafrumvarp atvinnuvegaráðherra, lengstu þingumræðu frá sameiningu málstofanna þar sem hann var á meðal ræðukónga.

Hann klykkir út með að segja að þrátt fyrir umsvif sín sé atvinnulífið alltaf í öðru sæti hjá sér.

„Ástríðan hefur verið að vinna með unglingum, að þeir nái árangri í lífinu. Ótal vinir mínir hafa ekkert skilið í því að ég hafi helgað mig kennslu í tæp þrjátíu ár þegar ég hafi haft ótal möguleika á að fara annað. Lífið er nefnilega miklu meira en peningar. Það er nefnilega miklu betra að geta hjálpað öðrum að breiða út vængina,“ segir Jón Pétur Zimsen, þingmaður Sjálfstæðisflokksins og erfingi umtalsverðra fjármuna.

• ÁrsreikningurÁRSREIKNINGUR2023
  Sækja skjal